九龍華仁書院安省舊生會

Wah Yan College Kowloon Alumni Association of Ontario

Welcome to WYKAAO

Contact Us

Welcome to our Special 1964 Web Section

64龍虎榜 - What are we doing now?

 

資料是來自'笨人'訪問'64班同學所得, 如有錯漏或要加料, 請通知'笨人'(This email address is being protected from spambots. You need JavaScript enabled to view it.), 加以改正.

以下文句有'狗屁不通'之處, 請多多包涵. 排名不分先後. 龍虎榜會繼續有料到, 請多多留意. Click here to download this article; use index for quick access

 

鮑大雄 Joe Tai Hung Pao 花名鮑鷄

離開華仁後, 六五年便考入美國Purdue大學, 主讀EE. 畢業回港, 喺中電做了兩年trainee. 沖了一輪電後, 七二年返美, National Semi-Conductor 做了幾年便跳槽Apple, 應用程序電板設計, 一路做到退休為止. 喜愛母校, 更鍾意唱校歌比同學聽, 真喺無得頂,即喺 'undingable'啦.
 

 

黄宇和 John Yue Wo Wong 花名唔知

能夠提早一年便考入香港大學, 真喺頂瓜瓜. 自從任教悉尼大學後, 學術成就就多蘿蘿, 真係十篇紙都寫唔完, 可惜篇幅有限,不能盡錄. 現已退休, 但仍繼續學術研究. 尤其起國父底子, 真喺不遺餘力. 且為國父歷史著書多本, 相信書中詳盡資料足足可以拍十幾卄套走向共和長篇劇集.

                             

 

洪德仁  Mark Tak Yan Hung 花名紅雞

離開華仁後便去英國繼續學業, 入大學時是住讀 Textile Chemistry, 畢業後卻在 Lab Analyst 方面發展, 當時這行業喺香港非常之吃香, 被人挖角返港後, 更大展拳腳, 當時佢好的另一半正發展名店生意, 越做越大, 做老公梗要幫手, 初初幫頭幫尾, 到後來更要全職打理名店 Shoebox 生意. 現下兩公婆已經退休, 但退而不休, 做義工回報社會. 值得一讚.

 

陸履東 Raymond Lei Tung Luk 花名唔知

Kansas 大學讀 Chemistry, 畢業後喺 Edison Power 打過工, 又攪 Trading, 後來因機緣巧合, 更做環保能源生意, 成為專家, 用回收塑料轉做能源, 化腐朽為神奇, 都唔好話唔巴閉. 繼續為環保努力, 要打救我哋咁污染嘅地球就要靠佢啦.

 

吳乙安 Jonathan Yat On Ng 花名儍飛

65年去美國加州, 66年入讀 加州 U of C Santa Barbara 經濟係. 畢業後喺 AT&T 管理層打工, 因覺工字不出頭, 便轉行做珠寶生意, 後來更去上海攪地產. 97年返 LA, 以家傳風水學去造福人羣. 現已經成為風水大師, 可喜可賀. 有一仔(Justin) 及一女 (Michelle).

 

戴錦池 Raymond Kam Chi Tai 花名太監

香港大學化學係畢業後就去教書, 造福香港弟子, 出名女歌星陳潔靈都是他的學生. 讀完MBA便替人打理工廠, 攪掂東廠又攪西廠. 後來移民澳洲悉尼. 轉行替人睇住盤數, 做會計, 一路做到現在, 還未打算退休. 有兩個仔, 大仔已經關埋天窗, 佢哋等緊抱孫呢.

 

 

 

 

吳茂鸞 Peter Mow Luen Ng 花名茂叔

華仁畢業後, 便加入政府部門做公務員, 服務香港社會三十幾年. 因九七當時, 香港處境唔多明朗, 便移民澳洲, 一移就移左十幾年. 在澳洲做義工, 服務社羣, 一路服務到2012年, 鳥倦思還, 回流香港. 有咁多做義工經驗, 如能在香港繼續做, 香港社羣就有福啦.

 

 

黄智明 Chee Ming Wong 花名大家姐

劍橋畢業名醫, 1977年喺香港大學醫學院任教了兩年, 去了英國行醫, 醫好無數英國鬼. 81年返港繼續行醫, 服務香港人. 更在2002年成為香港法國醫院 (St. Theresa's Hospital) 院長. 有女兩名, 都在英國辦事. 大女是医生, 細女在 Science Museum做. 太太亦是醫生, 做老人科, 記住是老人科, 即喺睇我哋啦.

 

邱德俊 John Tak Chuen Yau 花名唔知

好似前世欠IBM, 今世就同IBM打一世工. 做I.T. 佬. 出出入入IBM都唔知幾多次. 不特在美國IBM做, 連香港IBM都請佢. 而家離開IBM, 但欲罷不能, 因以前IBM的客還繼續不斷請佢幫手, 所以不能退休. 有女一名, 研究人體免役功能, 有’ 沙士’ 都唔需帕啦.

 

 

 

王蘇 Brendan So Wong 花名Vauxhall

有意思退休, 但未有, 還繼續喺德州 Texas A&M Health Science Center Baylor College of Dentistry 做 physiology professor, 從1983年一路做到而家, 30年眨眼就過佐, 梗喺做得好開心. 太太 Mimi 同佢都非常喜歡旅遊, 最近先至喺加勒比海遊完船河. 有女一名, 現喺英國倫敦辦事, 是一名optometrist.

 

譚光祖 Lawrence Kwong Tso Tam 花名唔知

香港大學醫科畢業, 喺香港醫院做了三年, 便去夏威夷深造, 成為內科專家, 便自己開診所, 懸壺濟世, 造福人羣, 因事業太忙, 完全無時間拍拖, 直至十年前才稔到結婚, 太太是護士, 故此不單得到個老婆, 還得到個好幫手. 有女一名, 今年八歲, 雖然在美國出世, 但並不忘根, 和父母是全部用國粵語溝通. 星期六上臺灣國語堂, 星期日更跟大陸先生學標準普通話呢.

 

 

甘定波 Ignatius Ting Po Kam 花名唔知

喺豐業銀行(Scotiabank) IT部門辦事, 做佐25年, 還未退休, 但已開始計劃, 相信為期不遠. 今年65歲, 屋企人及朋友五十幾人同佢做大生日, 極之開心. 平時每日都去gym做運動, 喜愛旅行, 將來退休, 肯定會四圍去. 有一仔一女, 就快投入社會辦事喇.

 

 

黄惠和Bill Wai Wo Wong花名牛屎

Wall Street工作環境有如壓力煲, 唔喺任何人都可以捱得住, 佢居然可以喺Chase Manhattan做Financial Analyst 到89年才退休, 就真喺唔簡單. 退休後當然要輕鬆自如, 故週圍去旅遊, 雖家住紐約, 但在紐約嘅時間, 每年都衹有四五個月, 大部份時間都會在香港或中國大陸, 旅遊兼探仔女. 有兩女兩仔, 細仔就快大學畢業, 兩公婆就更加安樂晒.

 

 

衛向榮Henry Heung Wing Wai花名香飛

懲教署工作, 精神科專家, 教導犯罪青少年卅幾年, 引領一班誤入歧途嘅後生仔返回正軌, 福澤下一代, 真喺無得彈. 55歲時要退休, 但退休一年, 不甘寂寞, 再東山復出, 更向嚴重一層嘅社會問題挑戰, 喺戒毒會辦事, 幫瘾君子逃離毒海, 造福社羣. 有兩女一仔, 個個已經投入社會工作多年, 兩公婆夠晒安樂喇.

 

劉漢銓 Ambrose Hong Chuen Lau 花名亞牛

香港出名律師, 政界紅人, 全國政協委員會常務委員, 曾任中西區區議會主席, 香港律師會會長, 總言之, 講起佢嘅銜頭就多蘿蘿, 不能盡錄. 八十年代已開始對從政有興趣, 1994年就幫手創辦民進聯, 次年就選任為立法局議員, 一路做到2004年. 又要做律師, 又要為國家辦事, 真喺忙到隻嘢咁, 都喺能者多勞之過. 有一仔一女, 每星期日重喺同佢兩公婆齊齊去聖堂, 佢哋真喺前世有修, 非常之有福氣.

 

於達 Gregory Tat Yu 花名魚蛋

居住温哥華, 出名牙醫, 退休都有好多年. 為了發展佢個人地產大計, 每日都駛車四圍睇屋, 好價就買, 大量入貨. 除佐睇屋外, 都會抽出時間, 去太太辦事嘅地方, 揾佢齊齊食晏. 有一仔一女, 聽聞嗰仔煮嘢有一手, 每星期都煮一餐拿手好餸, 孝敬佢哋兩公婆, 嘩!我哋好鬼羨慕呀.

 

 

徐建中 Alex Kin Chung Hsu 花名大頭徐

其實佢應該叫大頭厨, 離開華仁, 讀嘅做嘅都喺同厨有關, 十二年走遍非美兩地, 幫手打理酒店及餐館業務, 更在1975年替加纳政府開辦中餐館, 來幫襯都喺皇襯國戚, 社會名流, 如英國大耳王子及莎麗譚寶等等. 1980以積聚多年管理經驗及精炒局方法, 轉工替Panasonic打理一切, 不特管理得掂過碌蔗, 更替公司節省大量金錢. 2009年退休, 每星期唔喺打哥爾夫, 就喺打乒乓, 網球或麻雀, 還唱Karaoke, 忙得不亦樂乎. 有女一名, 是未來大狀. 篇幅有限, 未能一一細訴佢多彩多姿嘅事業生涯, 故請下載伊貓來電原文.

 

關英權 John Ying Kuen Kwan 花名唔知

如果你想知多些關於星球, 銀河及宇宙点樣形成, 你一定要同佢頃下, 佢D天文知識真喺無得頂. 喺麻省大學研究及教導天文多年, 2006年退休後, 繼續喺屋企研究, 梗喺啦, 宇宙咁大, 又咁深奧, 真喺有排做啦. 有一仔一女及一孫, 仔住加州, 要揍孫就要飛去加州, 女住纽約, 探女就方便得多. 平時除了繼續研究天文外, 還抽出時間幫大學嘅Newman Catholic Center及同太太打網球, 真喺樂在其中.

 

  

陳宏業 Lawrence Wang Ip Chan 花名辣椒仔

香港做會計多年, 做到87年退休, 88年就移民加拿大, 居住温哥華, 移民加拿大後, 便全職享受退休生活, 甚愛打網球, 每星期可以打足八日. 有一女, 居住香港, 就快生孩子, 所以老婆大人趕返香港幫手.

 

 

周浩 Gilbert Ho Chau 花名唔知

喺加拿大北電公司(Nortel) 辦事多年, 早年在多倫多, 後來內部轉工, 搬佐去彿羅里達州(Florida), 三年後又搬佐去亞蘭特(Atlanta), 继續喺北電System Engineering部門辦事, 55歲時離開北電, 自己做老細, 專做項目管理(project management). 佢走後, 北電就一蹶不振, 後來更要執笠關門, 佢真喺走得快好世界, 走得嚒無鼻哥. 兩年前退休, 平時就打哥爾夫或去旅遊. 有兩仔一孫, 真喺開心.

 

颜啟康 Canice Kai Hong Ngan 花名唔知

67年已經攪地產發展業務, 到了90年因移民加拿大才停止, 喺加拿大時, 思維忽然大躍進, 認為用面相可以預知未來, 在那方面大力研究, 加以科學引証, 成功率似乎甚高, 用於預測股票, 外幣及期貨高低, 成绩都唔錯. 故在沙士期間, 認為香港股市已經跌到谷底, 便回流香港大展拳腳, 實行要做到点石成金. 為了保存呢種技巧, 現已收了好多八十及九十後青年作為徒弟, 等後世都用得著. 真係偉大.

 

胡宏飛 Joseph Wun Fai Woo 花名亞D

曾被誤移民天國, 現下重現人間, 可喜可賀, 真想問佢路經天國時, 有無人提及2012喺世界末日. 佢退休已經十幾年, 退休前是打葯廠工(Abbott Laboratories, Chicago), 幫手睇住盤數, 做會計嘛, 其實佢喺讀化學, 但有MBA, 做會計真喺濕濕碎啦. 既然數口咁精, 退休後當然要攪下與錢銀有關嘅嘢, 好似買賣股票等等. 有錢賺, 又有得玩, 極之唔錯. 有三仔一女, 大仔重送佐嗰男孫大禮比佢添.

 

吳汝剛 Joseph Yu Kwong Wu 花名老虎狗

喺大國手, 但千祈唔好加埋嗰姓一齊叫. 醫術高明, 曾在北京行醫(並非赤腳醫生), 為祖國人民服務. 醫務發展到廣州時, 更邂逅現任太太. 現下衹為两地(上海和洛杉磯)服務, 但都極之忙碌, 退休不得, 除佐行醫, 自問無特別愛好(hobby), 其實咁熱愛醫生工作, 懸壺濟世, 何必要等退休, 現下便做緊佢嘅hobby喇

 

林穎源 Tommy Wing Yuen Lam 花名日本仔

家住温哥華, 移民加拿大有二十年. 做會計, 但退休都有三四年啦. 接觸我哋64班友都喺最近一兩年嘅事. 講起就有段古, 前兩年潘漢雄來温哥華探親, 喺街頭居然撞見及認出佢, 但當時大家都怱忙, 無正式交談, 但幾日後, 大家又在超級市場再撞見, 才交換通訊資料, 咁樣我哋才聯络到佢, 你話喺唔喺有緣呢. 有兩仔一孫. 孫仔住喺附近, 所以每日主要工作就喺揍孫, 跟住就喺睇狗, 其餘時間就用來上網, 睇乜唔知, 亦唔會問.

 

李兆鏗 Cecil Shiu Hung Li 花名馬騮仔

辦事嘅公司是攪地產發展及物業管理, 總部設在星加坡, 物業週圍都有, 但主要是在星加坡, 香港, 温哥華及美國各地. 家住温哥華, 因業務關係, 每年都有三四次, 要經香港去星加坡和老細共同研討大計. 有一仔一女, 亦有一個男孫, 是來自嗰仔. 仔住香港, 女住星加坡, 故此每次公幹都可以順道探仔探女, 份工有咁好嘅 ’jackso’ , 比我都唔會咁快退休啦.

 

張迪克 Dick Chang 花名唔知

在華仁時期就好想揸飛機(嚴重聲明, 並非是打…), 所以一有機會, 第一時間便去學揸. 還學埋揸直升機添. 聽聞試過租了架飛機, 喺德國上空暢遊了個多星期, 極之好玩咁講. 在加州打過high tech 工, 都喺同飛機及國防有關(詳情請下載原文). 現下考了教揸飛機牌照, 轉行做教機(並非教車)師傅. 如要知多些關於他教揸飛機嘅航空學校, 請按此處.

 

邵文澧 Maurice Man Lai Shiu 花名小曼麗

三藩市海灣區公務局長, 2009年退休, 適逢第一個孫出世, 兩公婆義不容辭即刻上門做椰蓉(爺傭) 及蔴蓉 (嫲傭), 四個月後, 知難而退, 炒了老細(大仔), 返家正式退休, 但一聽到個孫, 全身都開心到軟晒, 隨叫随到, 現在已有第二個孫, 更加開心. 平日唔揾孫時, 就打下哥爾夫, 幫下教會事務, 真喺優哉悠哉.

 

林永康 Tony Wing Hong Lam 花名林鷄

佢喺2008年退休, 之前打政府工, 管理資訊科技服務部門, 試過移民澳洲, 喺澳洲EDS做I.T. 佬, 但96年就回流香港. 有兩仔一女, 澳洲畢業後亦返回香港辦事. 退休後, 醫生吩咐, 每星期都去大陸惠楊打哥爾夫, 試過一次一桿入窿, 入袋一萬元正, 變佐做萬元户. 唔知有無請醫生飲番杯呢, 健身運動都可以揾錢, 你話醒唔醒目.

 

張國忠 Christopher Kwok Chung Cheung 花名唔知

佢可以退休好多年, 但公司(波音飛機廠) 唔放人, 而佢又做得非常開心, 又有人工攞, 何樂而不為. 屋在洛杉磯, 但西雅圖廠極需要他幫手管治, 故最近頻頻走兩地, 飛來飛去, 相信佢D飛行哩數積分多到用唔晒. 有一仔兩女, 兩個孫, 聽闻重有一個來緊. 如果你想知佢做乜飛機, 佢喺’伊猫’寫的名銜是Manager-747/767/777 Floor Structures, 但佢話787都有幫手. 坐波音機時, 記得睇下有無佢簽名.

 

李祖佑 Victor Cho Yau Lee 花名骰仔

喺City Bank做財務管理, 退休佐十幾年啦, 退休後自己管理自己財務, 以多年管理財務心得, 继续替自己做股票, 期貨及 貨幣買賣, 一於刀仔鋸大樹, 山大斬埋有柴燒, 都幾過瘾. 平時多運動, 夏天打哥爾夫, 駛風帆, 冬天就打網球及去gym操練, 還有玩樂器, 好似打下鼓, 吹下大喇叭, 極之寫意.

 

葉長蓊 Clement Cheung Yung Ip 花名老翁

講佢就’巴闭’, 佢喺水牛城(Bufferlo) Roswell Park Cancer Institute 主持癌症研究 (details), 和太太共同研究佐37年, 貢獻良多. 2009年退休, 但欲罷不能, 如果佢停止研究, 政府就會停止經費, 而跟他揾食多人就會從此失業, 故每星期仍要返工三日. 得閑時, 就繼續打鋼琴, 打哥爾夫及到處旅遊. 若要知他舊年(2011年)做過乜, 請按此.

 

伍傑忠 Ernest Kit Jing Ng 花名亞精

大忙人一名, 不但要打理喺番禺嘅製衣工廠, 還要睇住香港名牌Chevignon嘅生意, 成日稔住為班後生仔攪衣著(當然唔喺為我哋D老餅稔啦), 所以好多服裝名牌都喺由佢工廠攪掂架. 平時得閑就去打哥爾夫, 去揾窿打, 越打越有瘾咁講, 而家’老虎活’就唔多掂啦, 可以由佢頂上.

張慶 Jeffrey Hing Cheung 花名唔知

現下是八十吧先(80%)退休, 還有20%替舊公司(九鐵)做顧問, 幫手打理下盤數. 退休前有些少時間就已經在九華義務教英文, 現在有80%清閑, 更加多時間攪嘢. 打打殺殺, 即喺打高爾夫(殺草), 打棒球(殺對方), 還有打Band (就唔知殺乜啦), 好少打麻雀, 唔喺就大殺三方, 總之, 生活得多姿多彩, 極之唔得閑.

 

  

胡國亨 Henry Kwok Hung Woo 花名唔知

香港人替亞爺’打工’ 唔多, 佢喺其中一個, 現替中國’海峡兩岸和平统一基金會’ 辦事, 工作非常重要, 梗喺啦, 無佢攪掂, 容不易兩岸打起交來, 問你点算(講笑啫). 在華仁時期, 已勤作詩自娛, 現下吟詩作對嘅功力更加犀利. 有兩女兩子, 正喺’好好’, 非常之好.

 

吳寶鑑 Raymond Po Kam Ng 花名亞Bo

亞Bo, 因兩個Raymond (另一個是矇佬)在同一義工中心同一時間服務, 被叫為細威. 90年辭去香港電話公司工作後移民多倫多, 做過兩三間大公司非常重要嘅小職位, 並兼職做房地產經紀, 現已半退休. 平時日間會去社區中心跳吓排舞, 玩吓橋牌, 做吓運動. 今年三月中返香港娶新抱, 你話佢喺唔喺溜晒口水呢.

  

鄒秉漢 Frederick Ping Hon Chow 花名唔知

未退休前喺中國替合資公司管理工廠事務, 其後自己又攪出入口生意, 要中港兩圍走, 移民加拿大後, 更是三圍走, 非常事忙, 但忙得開心. 退休後, 就旅行各地, 東歐, 俄羅斯, 意大利等地都有佢嘅腳印, 因在中國做事多年,學得一口唔普通嘅普通話, 在內地旅遊就極之方便, 以前就三圍走, 而家同愛人(即喺佢老婆大人啦) 喺大陸就四圍走, 快活過神仙.

 

陳明生 Ming Sang Chan 花名大隻仔

為發展佢嘅鞋業批發王國, 不但唔可以退休, 還要頻頻喺中港澳(澳洲) 三地打理業務, 正式三圍走, 走得多, 你可以想像佢嘅三圍幾咁厲害. 以前在華仁玩二胡, 玩得非常出色, 現在事忙, 二胡發霉, 希望下次64舊生聚會, 帶埋二胡來演奏一番, 相信班同學都會'洗耳恭聽'.

 

陳敏然 Philip Man Yin Chan 花名唔知

皇仁書院音樂老師,1997年退休, 移民加拿大, 現居多倫多, 但早期陪仔讀書, 喺滑鐵盧(Waterloo) 住足成年, 對下一代照顧, 可謂無微不至. 平時得閑, 就行行企企, 食飯幾味, 有時打下麻雀仔, 但前排攞佐個麻雀大賽冠軍後, 就金盆洗手, 唔再打, 要保持佢冠軍形像嘛. 聽講就快要睇孫, 做爺傭啦, 老婆大人就做嫲傭.

 

廖柱文 Raymond Chu Man Liu, 花名矇佬 

雖名矇佬, 但唔喺真矇, 衹是有時難得糊塗之嘛. 聽講佢喺第一個提出要攪64班同學埋堆, 你話佢矇唔矇, 2006年唔再打政府工, 即喺唔再替政府房署去批則啦, 自己出來做, 庤瘡公司(對唔住, 口齒不靈, 是自創公司), 唔再受政府氣. 做得非常開心. 所以有第二春(或者喺第三四春都未定), 拍緊拖呢!

 

李榕堅 Philip Yung Kin Lee 花名教練

唔講都唔知, 原來佢喺舞林高手, 事源2005年退休後(即喺唔在澳洲南威爾斯大學教啦), 得高人指引, 同賢內助齊齊做舞林'宗'人, 鑽研各種舞藝, 打通六脈後, 更在舞林大打雷台, 每次比賽, 都滿載而歸, 講起佢哋D舞技, 真係十篇紙都寫唔完, 篇幅有限, 不如睇下佢哋打雷台D小电影吧, 下載原文.

Click here for Masters 2 Open New Vogue

Click here for Masters 2 Open Standard

 

 陸慶奇 Thomas Hing Kay Luk 花名唔知

2001年喺廣州開辦'海上寶', 是攪中國罐頭靚湯第一人, 攪得有聲有色, 香港好多即飲靚湯牌子, 都喺由佢工廠包辦. 三年前將工廠業務, 大部份交比老伙計打理, 最近更搵到九華同學麥振芳, 齊齊幫手去煲’大鑊’湯, 造福人群, 自己就半退休, 難得清閑, 詩詞歌賦, 樣樣都攪, 樣樣都掂, 真係頂瓜瓜.

 

梁健明 Roger Kim Ming Leung 花名亞明

年年都話要退休, 講佐多年後, 仍舊喺上班一族, 繼續做IT Manager, 照支人工, 仍舊有new money. 愛飲紅酒, 兼有研究, 聽聞家藏有四百支靚酒. 此外對餐飲都有多年心得, 是一家之'煮'. 正是虎父無犬子, 其大仔Vincent是多倫多四星鬼佬餐館的主廚(Executive Chef). 食好野就搵佢. 

 

顏友濱 Danny Yau Bun Ngan 花名牙崩

加拿大愛民頓(Edmonton) 唯一64同學, 從事旅遊業務多年, 2009退休, 退休後曾多次替朋友, 同學, 自己組織旅遊活動. 非常活躍. 閑時會每星期一, 三, 五在Senior Lions Club打乒乓球, 每次都不停打足一個鐘. 星期六更向大陸乒乓師父學習, 加強自己橫板乒乓技術, 預備橫掃天下. 星期日, 時間就留番比老婆大人, 同愛人齊齊跳社交舞, 羨煞旁人.

 

潘漢雄 Anthony Hon Hung Poon 花名班長

六年幾前退休, 仍繼續推廣教育下一代活動, 早期替中國航天帶香港青年上北京參觀, 令香港青年對中國航天成就, 有更深入認識, 後來更替香港多間國民教育機構, 帶領香港學生參觀中國各地, 令香港學生對中國了解, 更上一層樓. 現任多間天主教學校董事, 不遺餘力, 從事教育義工服務. 班長就喺班長, 服佐你.

 

王曙明 David Chu Ming Wong 花名飛仔

從事飲食行業, 攪過pizza franchise, 有pizza 皇子之美譽. 退休後, 致力於聯絡九華仔關係, 不但在2002年聯繫我地’64 班同學, 開始一連串聚會, 令我地班同學再次走埋一齊,更大力支持及發揚九華安省舊生會(WYKAAO). 現任九華安省舊生會會長, 推行一切有益身心活動(如打麻雀, 卡拉OK等等), 忙過不亦樂乎. 此外更鑽研玄學, 對八字, 命理及風水, 甚有心得.

 

鄺漢芬 Francis Hon Fun Kwong 花名肥鄺, 又名公公

一如其花名, 身體五官四十幾年不變, 在街遇他, 一定認得, 絕無問題. 現下孫仔孫女滿堂, 人數之多, 自認’64 同學無人所及, 而且繼續有來. 提早退休, 與孫同樂笑哈哈.

 

梁世達 Dennis Sai Tat Leung 花名賊婆

退休幾年啦! 以前行醫, 個個做醫生都可以搵十世都洗唔哂的錢, 可惜就無發生喺佢身上, 得個做字咁講, 連時間做運動都無, 退休後, 覺得身體唔夠苗條, 開始游水, 行街, 急起直追, 希望日後可以選做香港美男. 勇氣可嘉. 除此之外, 日日打機, 在電腦殺敵無數, 真喺童心未泯.

 

麥振芳Canice Chun Fong Mak 花名 Maidenform

呢幾年退休一次又一次, 好似喺永不言休. 最近退休後, 還繼續攪野, 同華仁同學陸慶奇齊齊去煲湯, 打理廣州 ’海上寶’ 工廠事務, ‘耐’ 不’ 耐’ 就去廣州. 聽講除了煲湯外, 好似在廣州還有其他野攪咁講, 但大部分時間都是, 賭賭馬, 打打麻雀, 怡情'大'賭, 但因賭技高超, 控制得宜, 亦非常之健康. 真喺值得讚揚.

 

陳景良 Dominic King Leung Chan花名神經

被迫退休十年, 而家是待業老青, 最近忽然記得, 以前在華仁有興趣畫圖畫, 離開華仁後便停了筆, 現在手痕, 開始畫番, 反正得閑無事做, 更比他自己一個project, 將所有旅遊過的地方, 起碼都畫一幅, 留作記念咁講. 可以話有排做.

You are here: Home Your Class Before 1970 Class 1964 64龍虎榜 - What are we doing now?