三人茶座，我是聽眾兼提問者。
我的問題：「點解 Adam 仔要讀咁多數學，讀極都有，佢讀文科，又唔係要做科學家。」
才子首先闖閘，大師禮貌地望著才子：「你先，你先。」
工程師口吻:「係咁嘅。」才子有電台講古佬聲缐，聽者順耳。
「世界上有好多理論，要用數學去證明。用數計出嚟，有凖確答案，講出關係。」
「例如，做架飛機。理論上係用空氣浮力，但點浮法？那就關係到流體力學。要計數。講就容易，計起來複雜。唔能夠得把口講嘢。」他講話有板有眼，唔諗女人時頭腦清楚。
大師開講：「啱，數學訓練人的邏輯思維，理解能力，小孩子尤其需要。」
「但聽住！有D嘢數學係計唔出嘅。」
嘩！我洗耳恭聽。
「嗱，有個數叫做infinity, 大到無邊無際，虛無到科學家都唔知係乜。」
哦！我以為大師在講日本仔車。
才子：「那當然，中國祖沖之把圓周率計到小數點六位數，後來的人再算，現是3.1415926535897932...水蛇春咁長。科學家將後面的數索性切咗佢。好似切咗條長蛇尾巴一樣。剩番個頭。」
嘩！斬蛇數學！巴閉。
大師繼續：「有好多大科學家。例如牛頓，愛因斯坦，未死的霍金，到後期都要回歸學哲學，因為有好多嘢冇數計，諗唔掂。」
「阿里士多德，海德格爾，沙特，這些聰明透頂之人一早就同我哋諗過晒。仲有乜好諗？」
才子反擊：「唔好成日將D科學研究解釋成禪學。乜都要數學。有得計，就係女人個心冇得計。現代的科學已經把哲學全部打敗。」
才子奇人，百計不離其宗，永遠有女人蹈(dau) 住。
大師用鄙視的眼光望著才子。說道：「你的層次唔夠高，同你講你唔明白。你又喜歡脫離題目。」
「我哋e班人，冇人接觸過如此高深的數學。就算是柏克萊學科學個班友仔。」
才子正經地回答：「你成日諗埋呢D嘢係冇用嘅。現實世界。乜都要有個實數。今早我檢查血糖，醫生話乜乜乜指數係120，係實數。我在糖尿病邊緣。上街市買棵菜都講幾錢一斤啦。」
大師超然：「我經歷過嘅嘢，見過嘅嘢係你哋未曾有嘅，唉。。」
才子笑道：「你講見鬼？」
他搬出科學理論：「鬼係中子，這世界只有中子可以穿牆而過。」
哈！這是我頭一回聽聞到此種解釋。
我插嘴：「乜嘢係量子力學？」
大師答：「可以咁講，量子力學係研究宇宙萬物慨，最細微嘅嘢嘅最新物理學。」
才子答：「暫時冇乜用。太過深奧，有D無釐頭。」
大師：「唔係。宜家有好多formula, 計算完之後再加量子力學，令其完美。」
才子：「從化學上嚟講，質子正電，電子負電，中子冇電。物質反物質。邊度搵帶負電質子。如果搵到，兩樣嘢相撞，能量可以爆開個地球。」
「搵到了負質子。歐洲人起咗個大圈圈，廻旋加速器，高速用兩樣嘢鬥撞。這世界級工程，搞到美國佬果個工程要收皮。」
才子：「冇咁事。」
大師拍案：「我同你賭一百皮，睇下邊個啱。」
「我唔賭錢。」
我雙眼迷茫看著倆位老友，臉孔的皺紋 "翁" 住。如果旁邊人睇見我，一定以為我的年齡有七張幾嘢。
大師嘴不停，手也不停，一邊講話一邊搞搞震個智能手機。「係咁先。唔同你講咯，我今朝早入左一百股xyz公司。宜家 Dow Jones 升咗二百點，我要返屋企上網出咗佢，揾番一千幾百。袋袋平安。」
詩云：半心時俗半心禪，歷歷紅塵未了緣，出入百家尋本我，願證菩提法自然。
大師愛入山見性，也鐘意在紅塵炒股票。他的電腦技巧是炒股得來的。
我同才子說：「睇住，佢一陣間仲會返嚟，帶住本書證明你錯！」
半小時後，我的電話響，是大師來電。
「你哋走咗未？」
我說：「未。講緊女人。」
他帶來了兩本中譯書。一本是「x」一本是「y」，我全無興趣。
大師打開本書，用手指著第幾頁第幾行：
「哪！你自己睇。」
才子認真讀，微笑：「又係噃。但你本係舊書。科學研究快到冇人信。」
大師常常勸才子，讀書要用功，不可以一知半解。這樣只能欺騙無知人。
大師贏晒！
才子評大師：「唔實在。諗埋D攞苦嚟辛嘢。學佛學佛，學出個大頭佛。」
我對住兩老友，擘大個口得個窿.
Don